Historia
Cas Sjabururi a wordo funda na 1988. E edificio tabata existi caba. Zuster Philothea tambe tabata hasi uzo di e edificio aki como un Pasadia. Despues nos Fundacion a cumpra e edificio y asina Cas Sjabururi a bin existi. Cas Sjabururi ta un Cas pa Reemplasa Famia. Semper tabata tin den mente traha riba un proyecto pa “Begeleid zelfstandig Wonen”. Den añanan `90/`91 a traha un maneho di vivienda. Pues diferente forma di vivienda cu kier a realisa e projecto “Begeleid Zelfstandig wonen”. For di añanan `90, e gobierno cu tabata na mando, a bin cu un plan di registracion pa e comunidad cu tin necesidad pa haya un cas. Ex – Director Arturo Werleman, a bay registra tur e habitantenan cu tabata riba lista di espera. E meta di Cas Sjabururi antes tabata: “Duna calidad di cuido pa 12 adulto mas grandi cu 21 aña.” Awendia e meta di Cas Sjabururi ta: “Duna calidad di cuido pa 12 adulto di 18 aña bay ariba te cu 65 aña.” E regla aki a bin na vigor desde aña `90.
Metanan
Cas Sjabururi tin como meta guia pedagogico y guia den cuido pa asina desaroya of mantene e independencia di su habitantenan. E intencion di Cas Sjabururi ta pa duna cuido y ayudo individualmente na e habitante. Cas Sjabururi kier logra esaki door di brinda e habitantenan un ambiente structural na unda nan por sigui desaroya nan mes segun nan capacidad. Pa por tin un mihor bista riba tur e metanan cu tin pa cu e habitantenan, ta wordu traha cu “Plan di Guia”. Na aña 2002 a construi dos apartamento riba e tereno di Sjabururi pa e proyecto “Begeleid zelfstandig wonen“. E proyecto tin como meta train e habitantenan cu tin e posibilidad di sigui desaroya pa nan mes biba independiente cu e ayudo necesario. E meta final di e proyecto ta pa e habitante biba independiente na su propio cas den un bario. Nuebe habitante a logra di biba riba nan mes caba. E personal di Cas Sjabururi ta sigui duna nan e ayudo necesario y ta sigui train nan segun nan capacidad. Si e habitante no tin e capacidad pa sigui siña e ora ta sigui stimula e abilidad cu tin ainda.
Habitantenan:
E habitantenan di cas Sjabururi ta personanan cu tin limitacion intelectual y door di diferente motibo nan no por biba mas na cas. E edad di e habitantenan ta varia. Esaki ta18 bay ariba. Durante e siman e habitantenan ta bishita e pasadia pa adulto Briyo di Solo y centro di entrenamento Man na Obra of ta participa den e proceso laboral. E personal di Cas Sjabururi ta sigui duna nan e ayudo necesario y ta sigui train nan segun nan capacidad. Si e habitante no tin e capacidad pa sigui siña e ora ta sigui stimula e abilidad cu tin ainda.
Programa diario
Mescos cu den tur famia, e habitante tin tarea di cas. Tambe ta ofrece na un ambiente ameno y nan tin chens pa diverti nan mes pafor di cas. Durante e siman nan tin diferente actividad. Dialuna y diamars nan ta train Badminton y Bolas y diaranson nan ta bay Zumba. Riba diasabra nan ta train rema. E actividadnan di e otro dianan ta wordu organisa door di e lidernan na warda. Un otro meta principal di e cas ta e integracion di e habitantenan den e comunidad Arubano. Tur aña tin campamento of nan tin nan dianan recreativo pafor di e cas. Ta e intencion pa mantene mas tanto cu ta posibel contacto estrecho cu e famia. P’esey e habitantenan, unda cu ta posibel, ta bishita famia den weekend of den vakantie.
Cas Sjabururi kier logra
- Cu e habitantenan haya oportunidad pa por tuma decision riba nan mesun bida personal y riba nan bida social.
- Integracion y participacion den e comunidad Arubano.
- Pa e habitante haya oportunidad di sigui desaroya nan mes segun nan capacidad y por uza nan abilidad den e proceso laboral.
- Mantene relacion cu famia, amigonan y conocirnan
Personal di Cas Sjabururi ta consisti di:
- 1 Hefe di departamento
- 6 Lider di grupo
- 2 Trahador domestico (part-time)
- 1 Kokki (part-time)
Cas Sjabururi
Tel: +297 522-7841
+297 522-7864 (despues di 4or)
Fax: +297 522-7850
E-mail: [email protected]