Centro Man Na Obra ta un departamento pa adulto di Fundacion Pa Esnan cu Un Deficiensia Intelectual Aruba. (Stichting Verstandelijk Gehandicapten Aruba / S.V.G.A.) Situa na Piedra Plat 97-A. Tel: 522-7859.
75 cliente adulto ta bishita Centro Man Na Obra diariamente. Centro ta habri di dialuna pa diabierna. Edad di e clientenan ta di 16 aña pa riba. No tin edad maximo, tanten cu e cliente por bay cu e meta di e departamento e por sigui participa. Centro tin 10 lider di grupo, un trahador domestico y un hefe di departamento.
Meta di e Centro ta pa brinda guia laboral p’asina e cliente por haya e.o. mas confianza propio, por yuda su mes riba mas tereno, sinti su mes mas util, bira mas independiente y pa algun cliente hasta pa nan por haya un trabao den nos mercado laboral.
E Centro tin diferente grupo di labor den cual e cliente mes por scoge esun cu e lo kier bay siña. Grupo di trabao cu e cliente por scoge pa traha na e Centro ta: grupo di strica paña, grupo cu ta traha bela, grupo di traha ceramica, grupo cu ta decora ceramica, grupo di hardin, grupo di carpenteria y grupo di laba auto. Den tur e grupo di trabao nan aki e accento ta keda poni p’e cliente haci e trabao di un calidad halto. Si ta un producto ta keda traha manera bela of ceramica, e articulo aki ta bay na benta. Tambe nos ta traha riba peticion pa ocacionnan manera ricibimento, bruid, bautismo etc. Otro trabao cu tambe e clientenan ta eherce ta trabao di hardin na cas di famia of empresa cu guia di un di nos lidernan y nos ta strica paña pa personanan particular.
Aspectonan laboral cu e clientenan ta siña den nan grupo di labor ta e.o:
- Cuminsa traha na tempo
- Concentra riba nan trabao
- Traha independiente
- Tuma iniciativa
- Anda na bon manera cu material y herment
- Bon comunicacion cu guia y e compañeronan di grupo
- Abilidadnan social
Ultimo cuatro aña nos a cuminsa tambe ta manda un grupo di cliente cu guia bay haci trabao pafo di nos Centro. Asina nos tin grupo ta bay haci trabao na un instancia of empresa. Nan ta bay bao guia di nos propio lidernan. Mayoria di e clientenan nan aki ta clientenan cu no por haya un trabao independiente debi nan edad of otro factor, pero bao nos guia nan por haci un bon trabao. Pa e clientenan cu tin un edad relativamente abao y tin un desaroyo positivo den nan abilidadnan di trabao, conducta, disciplina etc. nos ta busca stage pa nan pafo di nos fundacion pa nan por haya otro experencia di trabao. Tin un trahador di nos Centro cu ta encarga pa busca y guia e cliente aki na su stage (jobcoacher)
Un biaha pa siman (diabierna) e Centro ta brinda un programa pa haci e clientenan mas independiente cu ta posibel. Asina nos tin un grupo cu ta:
- siña cushina
- siña laba paña
- haci trabao domestico
- bay haci compra p’e departamento
- sali integra den nos comunidad
Nos tarea principal na e Centro ta pa laga e cliente haci mas tanto cu ta posibel e mes. Dun’e e guia unda e no por of mustr’e y dun’e guia p’e mes por siña pa haci mas cu ta na su alcance.
Personal di Centro Man Na Obra ta consisti di:
- 1 Hefe di departamento
- 10 Lider di grupo
- 1 Trahador domestico
Centro Man Na Obra
(Stichting Verstandelijk Gehandicapten Aruba / SVGA)
Piedra Plat 97-A
Paradera, Aruba
Tel: +297 522-7859
Fax: +297 522-7850
E-mail: [email protected] / [email protected]