Pasadia Bibito Pin ta un departamento di e Fundacion pa Personanan cu un Deficiencia Intelectual Aruba.
E ta un pasadia pa mucha cu ta brinda servicio na mas o menos 48 cliente entre 2 pa 16 aña. E Pasadia ta existi di 4 grupo di 12 cliente cada un. Tres di e gruponan ta parti segun edad, e otro grupo ta special pa clientenan cu un multiple handicap. E clientenan aki ta keda te 18 aña serca nos. Te ainda e Fundacion no tin continuidad pa e grupo aki.
E pasadia tin como meta mas importante optimalisa e desaroyo di e posibilidadnan di e mucha. Pa e motibo aki e programa cu ta brinda ta pa:
- haci e mucha mas independiente cu ta posibel
- stimula e mucha pa tuma iniciativa propio
- integra e mucha den e comunidad Arubiano
Cada cliente tin su programa individual adapta na su posibildad y su necesidadnan. Atencion ta wordo poni na ayudo propio p.e. comemento, trabou den hardin, cushina o trabao domestico. Pero tambe riba desaroyo di e sentidonan pa medio di material manera luz, sonido, cama di awa etc. Pa e desaroyo motorico ta uza material manera bicicleta, step, pero tambe e cliente ta haya programa individual of den grupo chikito cerca un terapista di movecion y esnan cu un multiple handicap tin programa di fysioterapia serca un fysioterapista.
E pasadia tin tambe na su disposicion un logopedista pa e clientenan cu tin problema di habla, gulimento y comemento.
Un biaha pa aña dokter di school ta duna nan un saminacion completo y ora mester e enfermera di Pasadia Bibito Pin ta tuma contacto cu e dokter di school pa pasa samina un of otro cliente.Nos ta traha hunto cu FAVI y FEPO pa e cliente cu problema di bista o oido.
Desaroyo di nos clientenan ta wordo sigui via un sistema automatisa cu ta yama PARNASYS (leerlingvolgsysteem)caminda tur hende cu ta trata e cliente tin acceso.
Cada 1 aña of 1 ½ aña ta tene un reunion plenario di e cliente, caminda tur hende interno o externo cu ta traha cu e cliente ta participa y tambe su mayornan. Na e reunion aki ta dicidi hunto con ta sigui cu e plan di guia individual di e cliente aki y mayornan ta haña tips con pa sigui gui’e na cas.
Pasadia tambe ta celebra tur e actividadnan manera Fiesta di Sinterklaas, Pasco, Carnaval etc.
Personal di Pasadia Bibitopin ta consisti di:
- 1 Hefe di departamento
- 9 Lider di grupo
- 1 Verpleegkundige
- 2 Trahador domestico
- 1 Kokki (part-time)
Pasadia Bibito Pin
Piedra Plat 97-A
Paradera, Aruba
Tel: +297 522-7845
Fax: +297 522-7850
E-mail: [email protected]
