Mision
Cuida, guia y siña e personanan cu limitacion intelectual pa nan por desaroya nan mes den personanan independiente, segun nan propio capacidad.
Vision
Brinda cuido y enseñansa di calidad halto na e personanan cu limitacion intelectual pa nan logra un bida di mihor calidad den comunidad, na unda mayornan/esnan cu ta cuida y/of esnan responsabel, clientenan y profesionalnan ta traha hunto.
Historia di e Fundacion
E atencion na e personanan cu un limitacion intelectual a cuminsa na principio di aña sesenta. Esnan envolvi den e temporada ey tabata un trahador social, un dokter di cas y un enfermera di Wit Gele Kruis. E situacion caminda e personanan cu un limitacion intelectual tabata keda scondi y bibando den condicion miserabel a conmove nan y a dicidi pa haci algo. Durante un reunion di e “Mental Health Society” cu por ser considera Fundacion madre di nos Fundacion, Dr. Harting a trece e problema padilanti. Riba 4 di juni 1964 durante nan reunion 3 miembro di e “Health Society” a haya e tarea pa lanta un fundacion.
Dia 9 di december 1964 e Fundacion “Stichting ter behartiging van de belangen van het gehandicapte kind” a keda lanta. Nan a forma un comision cu a cuminsa traha plan y interesa e mundo politico pa haci algo cu e problema cu nan a encontra.
E Fundacion, ainda careciendo di e experencia necesario, a cuminsa haci investigacion. A base di e resultado a fiha un plan parti den cuatro fase teniendo cuenta cu e necesidad.
- E prome fase tabata encera un pasadia pa mucha cu un handicap severo. Dia 1 di november 1973 e prome pasadia a keda habri den un scol bieu na Piedra Plat. E pasadia ta conoci como Pasadia Bibito Pin.
- Na aña 1976 e segunda fase locual ta encera un scol pa personanan cu limitacion intelectual a keda habri. E scol ey a haya e nomber Scol Dununman. Pero trahando cu e chikitonan a encontra e necesidad pa traha pa e grandinan tambe cu ta kedando cas sin ningun forma di ayudo.
- E tercer fase ta un consecuencia logico di e dos fasenan anterior. A fiha como meta di e tercer fase:
- Un pasadia pa adulto
- Un centro di entrenamento
Dia 8 di januari 1979, den Bernardscol na Brasil e Fundacion a habri un pasadia pa adulto. E personal tabata duna programa basa riba e modelo di actividad na e clientenan di pariba di brug durante e oranan di mainta. Merdia e clientenan di pabao di brug tawata haya guia den e edificio di Scol Dununman. Na 1980 e fundacion a cumpra un cas na Sjabururi, caminda Zr. Philothea tabata tin un grupo.
Cu apertura di e centro nobo na 1985 e clientenan di e pasadia na Brasil y Sjabururi a muda pa Piedra Plat den e departamentonan Briyo di Solo y Man Na Obra.
- E clientenan di Pasadia Bibito Pin tambe a muda pa e centro nobo. E edificio di Pasadia Bibito Pin a keda converti den oficina pa administracion y tambe oficina pa e grupo di specialista cu a bin traha cu e Fundacion.
- E di cuater fase cu ta encera un cas pa reemplasa famia a ser habri na aña 1988 na Sjabururi.
E clientenan aki no tabata tin un lugar pa keda y biba. Nan mayornan a muri of a bay den un cas di anciano y e otro miembronan di famia no por a tuma nan. Den Cas Sjabururi a admiti 12 persona di 18 aña pariba, cu na e momento ey tabata e casonan mas urgente. Pero esey no tabata e unico necesidad pa un lugar di biba special pa nos clientenan.
Prome cu Status Aparte hopi di nos hendenan cu limitacion intelectual cu “multiple handicap” tabata keda manda y admiti na Monseigneur Verriet Instituut y na Rustoord na Corsow. Otronan tabata bay Hulanda, Colombia y Venezuela. Pero diripiente tur porta a dal sera y nos hendenan cu limitacion intelectual den necesidad no tabata keda admiti mas den exterior. E escasez na lugar pa nan propio hendenan, e costo halto den exterior tabata e motibonan principal cu e pedida pa vivienda na Aruba pa nos hendenan special a cuminsa crece.
E Fundacion conciente di su responsabilidad pa cu nos clientenan a sigui planifica y trece proyectonan cu por alivia esnan cu tabata pidi ayudo.
Na 1988 e Fundacion a traha un “projectdossier” yama, ”Aruba also for disabled Arubians a Happy Island”. E “projectdossier” aki a bay riba restructuracion di e Fundacion den cual tambe e plan pa ehecuta e di cuatro fase “vivienda” a keda traha.
Na aña 1989 un otro “projectdossier” yama “Wonen voor Geestelijk Gehandicapte Mensen” a keda traha y entrega na Gobierno di Aruba y na KABNA. Di KABNA nos a ricibi e noticia cu e proyecto tin nan simpatia. Gobierno di e tempo ey a pidi e Fundacion pa revisa e proyecto pa baha e gastonan envolvi. Na oktober 1991 e Fundacion a entrega e proyecto revisa “Wonen voor Geestelijk Gehandicapte Mensen in Aruba”.
Despues di esaki e Fundacion a purba den combersacion cu Gobierno pa realisa e proyecto. Pa motibonan fuera di nos alcance e proyecto no a keda realisa. Hopi famia a haya nan mes ta bay foi Aruba forsa buscando un bida mihor pa nan yui y nan mes den exterior. Otronan a keda Aruba y ta bibando den situacionnan deplorabel.
Mirando e presion creciente riba e Fundacion pa bini cu mas posibilidad di vivienda a pone e Fundacion busca un solucion mas practico, barata y cu por keda realisa den un tempo cortiko.
Como cu e convento banda di Imeldahof no tabata keda uza y ta ideal pa un internaat, Fundacion hunto cu Kindertehuis Imeldahof na aña 2001 a traha un projectdossier yamá “Projectdossier Klooster Imeldahof”. Esey tabata destina pa e casonan mas severo y di hopi urgencia cu ta exigi un cuido total di 24 ora pa dia. E proyecto aki tampoco no por a keda realisa, pasobra Gobierno a duna e convento un otro destino.
A trece tur esaki padilanti pa mustra cu aunke cu e Fundacion no ta haya tur ora e debido oido y atencion pa su proyectonan y ta keda decepciona, toch e Fundacion ta sigui traha y lucha cu perseverancia pa logra lo maximo posibel pa e bienestar general di nos clientenan special.
Nos lista di espera a sigui crece y na e momentonan aki tin 75 persona riba e lista pa un luga di vivienda. Cu apertura di e proyecto aki e cantidad lo baha!
E directiva basando su mes riba normanan di vivienda y derechonan internacional pa personanan cu un limitacion y basa riba su puntonan di maneho esta integracion, aceptacion, normalisacion y educacion algun aña pasa a tuma e desicion pa introduci e maneho (begeleid wonen) na papiamento “biba ariba bo mes” den grupo, den e barionan boa guia. E motibo principal di e maneho aki ta pa duna e clientenan cu ta capaz pa haci esey, biba riba nan mes, na principio bao di guia y despues bira mas independiente cu ta posibel.
E solucion ey ta cuadra cu nos vision cu nos hendenan tin e derecho riba vivienda mescos cu tur otro hende den nos comunidad. Nan tin e derecho di ta biba memey di tur hende, di keda acepta, proteha y respeta.
Pa e maneho di biba bou guia den comunidad, hiba nos clientenan na un mihor calidad di bida, nan mester haya programanan preparativo caminda nan ta desaroya e abilidad diario pa actua mas independiente, laga nan opinion resona y planifica nan bida diario.
Dos apartamento a keda traha banda di Cas Sjabururi y inaugura dia 21 di februari 2003, especialmente pa duna nos hendenan e training necesario pa asina despues di un tempo nan por bay biba den un cas den nan propio bario. E proyecto aki a keda completamente financia door di e Fundacion mes conhuntamente cu placa di donacion di henter e comunidad.
Despues di esaki nos a cuminsa hiba combersacion riba propio iniciativa cu Sr. van Poppel di F.C.C.A. y su staff cu den un futuro cercano nos kier yega na un cooperacion estrecho cu F.C.C.A. caminda lo bin casnan di pueblo disponibel, cu lo ser destina pa nos proyecto di “begeleid wonen” y pa realisa un internado na e edificio na Jaburibari. E projectdossier di e internado a keda traha y entrega door di S.V.G.A. y F.C.C.A., pero no a keda honra.
Despues di dos aña y cu orguyo, e bunita proyecto di “Begeleid Wonen” a bira realidad y inaugura. Seis cas di dos y tres camber tur adapta na e condicion di e habitantenan a keda entrega na e clientenan cu a ricibi nan yabi. E guia na e clientenan lo keda duna door di e staff di Cas Sjabururi cu lo ta para cla 24/7 pa duna asisitencia na e clientenan. Tambe a hiba combersacion cu Polis di bario, departamento social di Paradera, y otro servicionnan di e barrio pa asina traha un netwerk cu lo garantisa e exito di e proyecto aki. Awor ta resta e proyecto “Internado pa personanan cu Multiple Handicap” pa keda realisa cu urgencia.